Երեվանյան բնակարանների գների տատանումները մեծ են

2019 թ․ առաջին եռամսյակում բազմաբնակարան բնակելի շենքերի բնակարանների շուկայական միջին գները՝ 1քմ հաշվարկով աճել են մոտ 10%-ով։ Ինչպես միշտ, մեծ տարբերություն կա տարածագնահատման գոտիների միջև․ այսպես Կենտրոն համայնքի 6 գոտիներից եթե ամենակենտրոնում՝ Կենտրոն միջինում, գներն աճել են մոտ 18%-ով, ապա 3-րդ  գոտում աճն ընդամենը 6% է։ Արաբկիրի ամենաթանկ գոտում անցյալ տարվա համեմատ աճը եթե 10% է, ապա ամենաէժան՝ Գոտի 3-ում, մոտ 4,5%, այսինքն գրեթե այնքան, որքան Շենգավիթի Միջին գոտում։

Մի հատկանշական փաստ ևս՝ Կենտրոնի ամենաթանկ գոտուց հետո գնաճի ամենաբարձր տեմպեր են գրանցել Աջափնյակի 4-րդ և Մալաթիա Սեբաստիա համայնքի 8-րդ գոտիներում՝ համապատասխանաբար 16.9% և 13%: Իսկ ահա Մալաթիա Սեբաստիա համայնքի 6-րդ գոտին միակն է, որտեղ անցյալ տարվա համեմատ նկատվել է նվազում՝ -3.8%:

Հարկ է նշել, որ վերոհիշյալ խճապատկերում գների աճի ու նվազման վրա էական նշանակություն կարող է ունենալ այն հանգամանքը, թե որ գոտու, որ շենքում որքան գործարք է իրականացվել։ Քանի որ գոտիների ներսում էլ՝ կախված շենքից, բնակարանների գները կարող են ունենալ էական տատանումներ։